Yamaha 2WD
Mótorhjól með drif á báðum
 
Stutt er síðan fréttir tóku að berast af tvíhjóladrifnu torfærumótorhjóli frá Yamaha. Tæknin, sem er þróuð í samstarfi við Öhlins demparaframleiðandann, kom fyrst fram á sjónarsviðið árið 1998 þegar tvö Yamaha YZ250 voru sýnd almenningi í Svíþjóð. Ári seinna tóku tvö Yamaha TT600R þátt í Eyðimerkurrallinu í Sameinuðu arabísku furstadæmunum, en þar sá greinarhöfundur hjólin í fyrsta skipti og þótti mikið til um. Árið 2001 kom tæknin fyrst í WR426F hjólinu frá Yamaha en þá náði það fimmta sæti í Shamrock rallinu í Marokkó. Árið eftir vann svo hinn franski David Fretigné fyrsta sigurinn á tvíhjóladrifnu Yamaha í sama ralli. Hann keppti í fyrsta skipti í París-Dakar rallinu á slíku hjóli í ár og náði þar sjötta sæti ásamt því að vinna tvisvar á sérleiðum.
 
Betra veggrip
 
En hvernig virkar eigninlega tvíhjóldrifið mótorhjól? Afturhjóladrifið er hefðbundið og óbreytt en framdrifið er hins vegar vökvadrifið. Fyrir ofan gírkassann er vökvadæla sem er drifin með keðju frá gírkassanum. Vökvadælan þrýstir síðan vökvanum eftir slöngum til vökvarótors í framhjólinu, en hann snýst eftir því hversu mikið af glussa er dælt inn í hann. Þessi uppsetning gerir það kleift að hægt er að stýra átakinu á framdekkið eftir gripi afturdekksins. Kerfið stillir sig sjálft og dreifir aflinu á hagkvæmasta hátt en einnig er hægt að stilla það þannig að það gefi meira eða minna átak á framdekkið. Öhlins hefur náð góðum árangri í að þróa kerfið á þannig að það leiði ekki til bilanna í gírkassa eða drifinu sjálfu og búnaðurinn er líka svo léttur að fæstir taka eftir aukaþyngdinni, sem er sáralítil. Samkvæmt tölum frá Yamaha hefur hjólið 10% meiri hámarkshraða í sandi vegna betra veggrips.
 
Fyrsta eintak til almennings
 
Einn af þeim sem heilluðust af þessari hugmynd og fór að fylgjast með fréttum af því á netinu er Guðbergur Guðbergsson. “Kunningi minn Eyþór Örlygsson sá þetta fyrst og sagði mér frá því. Ég varð alveg sjúkur og sagði að þetta yrði ég að fá mér”sagði Guðbergur í viðtali við Bílar og Sport. Hann fór strax í að senda tölvupóst út og reyna að fá slíkt hjól keypt. Guðbergur sendi þeim allar upplýsingar um sig og bauðst til að prófa þetta hérna heima fyrir þá. “Í upphafi vildu þeir ekki gera neitt, sögðu hjólið vera í þróun og þeir mættu ekki selja það strax. Eftir að hafa unnið áfram í málinu gegnum Öhlins umboðið hér heima og einnig Yamaha umboðið, fór loksins eitthvað að gerast. Þeir voru á leiðinni með þrjú hjól í París-Dakar rallið og ég átti að fá eitt að þeim keypt eftir keppnina” sagði Guðbergur. Svo gerðist það að aðeins eitt hjól mætti til leiks og Guðbergur fékk ekki að kaupa hjólið í það skiptið. Þá sögðu þeir honum að til stæði að hefja sölu á hjólinu seinna á árinu og þá aðeins í gegnum Yamaha umboð. “Umboðið hérna heima hafði ekki einu sinni frétt af þessu þegar ég talaði við þá og vildu fyrst ekkert gera en létu svo til leiðast og sendu fyrirspurn. Svarið kom svo til baka og var á þá leið að ég gæti fengið afhent hjól í apríl 2004. Svo leið og beið að páskum og ekkert fréttist enn af hjólinu svo að ég fór aftur á fullt ásamt Yamaha umboðinu að senda tölvupóst á liðið og reyna að hreyfa við málunum. Þá kom svarið að það hefði orðið dráttur í framleiðslu og að hjólið kæmi ekki á markað fyrr en eftir seinna á árinu. Ég svaraði um hæl að það gengi ekki þar sem að ég væri búinn að skrá mig til keppni í þolakstri á Klaustri í lok maí, og yrði einfaldlega að fá hjól fyrir þann tíma. Við sendum þeim tölvupóst á hverjum degi í maí í fyrra og það endaði með því að staðfesting barst að hjólið væri á leiðinni hingað heim með flugi og væri væntanlegt daginn fyrir keppnina” sagði Guðbergur, og gekk það eftir. Það kom svo ekki í ljós fyrr en seinna að þetta var fyrsta hjólið sem var selt frá verksmiðjunni til almennings.
 
Hentar í endúró
 
En hvernig tilfinnig er það eiginlega að keyra mótorhjól með drifi á báðum hjólum? Guðbergur segir sposkur frá því hvernig hann flaug nokkrum sinnum á hausinn í keppninni eftir að hann fór að beita því. “Gerðist það tvisvar í röð á sama stað, en það var á hörðu moldarundirlagi og missti ég einfaldlega afturdekkið undan mér” sagði Guðbergur. “Það sem gerðist þá var að framdekkið náði að spóla í beygjunni og ég datt við það. Svo fór maður að læra á þetta og passa sig á þessum stöðum sem voru varasamir fyrir hjólið” sagði Guðbergur ennfremur. Að hans mati er þetta ekki hjól sem myndi henta í keppni á mótókrossi en sem endúróhjól er hjólið hrein snilld segir hann. “Þú hefur svo gott grip að þú kemst alls staðar upp þar sem að flestir færu ekki nema mjög vanir, þannig þú þarft ekki að vera eins góður til að komast upp brekkurnar. Það sem hjólið er sérstaklega gott í er hliðarhalli í sandi og þess háttar, því ef þú missir gripið á afturdekki þar með spóli er framdekkið orðið laust líka. Eins er hjólið alveg frábært í snjó og harðfenni. Þá byrjar maður neðst í brekkunni og klifrar upp á meðan aðrir þurftu að taka langt tilhlaup til að komast hálfa brekkuna” sagði Guðbergur um hjólið. Hann fór í vetur upp á Lyngdalsheiði á hjólinu og hitti fyrir það sleðamenn. “Þeir hreinlega göptu yfir því hvert maður komst á hjólinu. Hjólið lullaði upp brekkur í öðrum gír sem að þeir komust einfaldlega ekki á sleðunum” sagði Guðbergur og brosti út í annað. Guðbergur ætlar sér að eiga hjólið áfram enda eina eintakið á landinu og þótt víðar væri leitað.
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald