Mercedes-Benz S-lína

Leitin að fullkomnun

 
Þegar leitað er að lúxus í bílum kemur Benz merkið oft upp í hugann. S-línan frá Mercedes er stærsti og íburðarmesti bíllinn í þeirri fínu fjölskyldu og á árinu kom ný kynslóð hans á markað. Bílum og Sport gafst tækifæri að reyna aðeins lengri gerð bílsins sem meðal annars var búinn nýjasta tækniundrinu frá Benz sem er næturmyndavél fyrir ökumanninn. Nýja kynslóðin er í senn lengri, breiðari og hærri en fyrri kynslóð. Samt mun hann eyða 9% minna vegna þess hversu léttari hann er en mikið er notað af áli í yfirbyggingu hans. Prófunarbíllinn er í einkaeigu en var fluttur inn með dyggri aðstoð gamla umboðsins, Ræsis sem að einnig þjónustar bílinn.
 
Langur búnaðarlisti
 
Óhætt er að segja að búnaðarlistinn í S-línunni er langur, eins og bíllinn. Fyrir utan “venjulega hluti” eins og sjálfvirka handbremsu sem að heldur við bílinn í brekku, fjölda minnisstillinga í rafstýrðum sætum og rafstillt aftursæti er hægt að nefna enn tæknilegri hluti. Helst er hægt að ímynda sér að hönnuðir Mercedes hafi fengið að sleppa fram af sér beislinu í hönnun tækjabúnaðar í þessm bíl. Skriðstillirinn er með radar þannig að hann nemi fjarlægð í næsta bíl en flottasti fídusinn er án efa næturmyndavélin. Með því einu að ýta á takka breytist tölvuskjármælaborðið í sjónvarpsskjá sem sýnir umhverfið fyrir framan bílinn, betur en ökumaðurinn sér sjálfur. Gafst tækifæri til að prófa myndavélina bæði í myrkri og þoku og er hún mjög næm og sýnir vel það sem er framundan í myrkrinu. Samt er ekki beint þægilegt að einblína lengi á skjáinn við aksturinn því það er eins og maður verði frekar að hafa augun á veginum til að hliðarsjónin njóti sín.
 
Engin skortur á rými
 
Það þarf engan að undra að rýmið er meira en nóg í S-línunni og þá ekki síst í lengri gerðinni. Hjá framsætisfarþegum er rúmt en enn frekar hjá farþegum í aftursæti, sem stundum eru eigendur bílsins í þessum flokki. Skottið er svo gríðarstórt enda það stærsta í flokkinum. Í ökumannssæti er hægt að stilla sætið á alla vegu rafstýrt og einnig höfuðpúðann og stýrið. Sætið er með minnisstillingum og einnig farþegasætið. Það sama er uppi á teningnum í aftursætum og auðvelt að halla sér vel aftur í þeim. Aftursætin minna þannig eiginlega meira á tannlæknastól en venjulegt aftursæti í bíl. Fótarýmið er þannig að hægt er að teygja alveg úr fótunum og farþegi hægra megin getur meira að segja ráðið hversu framarlega sætið fyrir framan hann er.
 
Dísilvélin góður kostur
 
Bíllinn sem við höfðum til prófunnar var með minnstu vélinni en var samt nokkuð öflugur.
V6 dísilvélin er eina dísilvélin í boði í S-línunni en hún hentar bílnum einstaklega vel. Aflið í henni dugar bílnum vel enda skilar hún 235 hestöflum og 540 Newtonmetrum af togi. Þar að auki er hún mjög sparneytin miðað við svona stóran bíl því að hún eyðir ekki nema 8,5 lítrum með sjálfskiptingu í blönduðum akstri. Bíllinn er sérlega hljóðlátur í akstri eins og við var að búast en hægt er líka að panta hann sérstaklega með hljóðeinangrandi gleri. Sjö þrepa sjálfskipting er staðalbúnaður og ekki er hægt að fá S-línuna beinskipta, svo einfalt er það. Loftstillt fjöðrunin er alveg sér á parti í þessum bíl og gerir mikið fyrir aksturinn. Fyrir það fyrsta verður bíllinn mjög rásviss á vegi og talsvert þarf til að hann missi grip, en þá grípur líka skrikvörnin inn í af öryggi. Auk þess er aðdáunarvert að sjá hversu vel þessi fjöðrun ræður við ójöfnur, en það var sammerkt með öllu sem á vegi hans varð, hvort sem það var kanthindrun, holur eða þaðan af verra, að maður tók nánast ekki eftir því.
 
BMW 7-lína ódýrari
 
Helstu keppinautar S-línunnar eru ekki margir en þeir eru helstir BMW 7-lína, Audi A8, Lexus LS og VW Phaeton. Hérlendis er mest til af 7-línunni en grunnverð hennar með þriggja lítra dísilvélinni er 8.300.000 kr. Hjá Öskju kostar S320 CDI 9.600.000 kr. svo að verðmunurinn er talsverður, nánast bílverð smábíls. Lexus LS bíllinn er einungis fáanlegur með bensínvél og kostar í grunninn 10.500.000 kr. en ekkert verð er gefið upp fyrir Audi A8 á heimasíðu Heklu þar sem hann er einungis sérpantaður.
 
Mynd: Tryggvi Þormóðsson.
 
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald