Land Rover Defender 38"

Fullbreyttur Defender?

 
Fyrir marga er Land Rover Defender hinn eini sanni jeppi og víst hefur 110 útgáfan eða sá langi verið vinsæll breytingarbíll. Margt hjálpast þar að eins og dugmikil 2,5 lítra dísilvél með forþjöppu, sterkur gírkassi með lágu drifi og læsanlegum millikassa og gormafjöðrun á heilum öxlum allan hringinn. Ekki skemmir heldur fyrir möguleiki á að flytja 9-10 farþega og hrátt útlit sem að mörgum þykir kostur þegar kemur að fullvöxnum breytingum. Sumir segja líka að Land Rover fái ekki rispur, bara ör sem þarf ekki að laga en sumum kann að þykja það of langt gengið.
 
Með sjálfskiptingu
 
Bílum og Sport bauðst um daginn að skoða nýlega breyttann Defender frá B&L sem er um marga hluti sérstakur. Fyrir það fyrsta er hann með Ashcroft sjálfskiptingu sem þurfti að sérpanta frá verksmiðju. Auk hennar var búið að setja í hann loftlæsingar að framan og aftan og skriðgír auk sterkari framöxuls úti í Bretlandi þannig að segja má að breytingarferlið hafi hafist þar. Meðal aukabúnaðar sem sérpantaður var í bílinn voru samlæsingar, loftkæling, hiti í framsætum og rúsínan í pylsuendanum, upphituð framrúða sem kemur sér eflaust vel í vondum veðrum á fjöllum.
 
Breytt hjá B&L og Nesradíó
 

Bílnum var svo breytt áfram á verkstæði B&L á 38 tommur af þeim Ásgeiri og Dassa, en sumir þekkja G4 Range Rover bílinn hans Dassa sem birtist á síðum B&S síðasta vetur. Auk þess að hækka bílinn var bekk afturí breytt og færður aftar auk þess að komið var fyrir myndarlegu bassaboxi afturí farangursrými. Sett var Webasto bensínmiðstöð í bílinn til að engum þyrfti nú að verða kalt. Mótor slapp heldur ekki við breytingar og sett var ný og breiðari pústgrein auk tölvukubbs sem að gerir vélinni kelift að skila af sér rúmum 170 hestöflum, sem verður bara að teljast nokkuð gott. Aftan á bílinn fór svo statíf fyrir skóflu, tjakk og járnkarl auk box, svona til að gera verklegan bílinn enn verklegri. Öll breytingarvinna á rafkerfi fór fram hjá Nesradíó en þeir sáu meðal annars um að koma fyrir talstöð, NMT síma og tölvutengi auk GPS leiðsögutækis. Á ljósagrind var komið fyrir gulum þokuljósum og stórum Xenon kösturum sem tengdir voru við háu ljósin, en aftan á og á hliðum hans var komið fyrir fjórum vinnuljósum.

 
Í Karlaríki
 

Ákveðið var að láta ekki minna en góðan dag á fjöllum duga til að prófa tröllið. Veðurútlit var nokkuð gott, bjart en hvasst og snjó búið að skafa í nokkra myndarlega skafla svo fyrirséð var að reyna myndi nú aðeins á gripinn. Ekið var sem leið lá á Þingvöll og þaðan upp Uxahrygg, upp fyrir Biskupabrekku og til hægri línuveginn norðan við Skjaldbreið. Ekki þótti viturlegt að reyna við fjallið að þessu sinni þar sem enn var nokkuð autt þar uppi en þess í stað var stefnan tekin á Karlaríki og í humátt að Langjökli. Var þar nóg af snjó til að sjá hvað í bílinn væri nú spunnið. Þótt að bíllinn væri nú á frekar hörðum dekkjum sem hömluðu aðeins drifgetu hans, þar sem ekki var hægt að hleypa úr meira en niður í 4-5 pund, kom það ekki að sök. Krafturinn frá vélinni kemst allur til skila þegar ekið er á botngjöf og þegar ekið er þannig í gegnum snjóinn með bílinn læstan í bak og fyrir er fátt sem stoppar hann. Það er sjaldgæfur lúxus að hafa sjálfskiptingu í Defender og hún hjálpar upp á torfærueiginleika hans þar sem af aflinu er nóg. Frábær fjöðrun Land Rover jeppanna hjálpar þar líka til við að halda hjólunum þar sem að þau eiga að vera. Tvisvar kom þó fyrir að bílinn festist en þá kom sér vel að hafa skriðgírinn og þurfti ekki að húkka í ferðafélagana til að losa hann, sem betur fer. Eins og með alla mikið breytta bíla er þessi Defender ekki fullbreyttur enda stendur til að bæta spili framan á hann og sitt hvað fleira. Óhætt er þó að segja að það nauðsynlegasta er komið, nóg til að koma honum nánast hvenær og hvert á land sem er.

 
Myndir: Tryggvi Þormóðsson.
 
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald