Mercedes-Benz C-lína

Aftur á toppinn

Eins og lesendur Bílar og Sport hafa getað séð á síðum okkar var ný kynslóð C-línu Benz væntanleg með allnýstárlegu útliti. Birst hafa njósnamyndir af bílnum við prófanir í fyrra og nú nýlega myndir af næstu útfærslum hans, bæði langbak og tveggja dyra Sportcoupé útfærslu. Askja bauð á dögunum hópi íslenskra blaðamanna til frumprófunar á nýju C-línunni í Valencia á Spáni og slóst undirritaður með í för. Tímasetningin var vandlega valin því að C-línan á einmitt aldarfjórðungsafmæli, en fyrsta kynslóðin var kynnt á bílasýningunni í Genf í mars árið 1982. Síðan hafa meira en 6 milljón eintök verið seld af þessum vinsæla bíl.
 
Róttækar útlitsbreytingar
 
Kynslóðin sem nú er kynnt er sú fjórða í röðinni og eins og síðast eru útlitsbreytingarnar róttækar. Í stað kringlóttu framljósanna eru nú komin stór margspegla ljós með hvössum brúnum sem setja mun ákveðnari svip á bílinn. Framendinn hefur líka hækkað nokkuð svo að bíllinn er kominn með kónganef ef svo má segja. Útlitsbreytingarnar eru sóttar í S-línuna og sýna svo ekki verður um villst að það eru svipmiklar breytingar í vændum hjá Mercedes-Benz. Bíllinn hefur líka stækkað nokkuð, hann er 55 mm lengri og er hjólhafið lengt um 45 mm. Eins er hann breiðari um 42 mm sem að eykur mjög axlarými innan í bílnum. Bíllinn verður í þremur útfærslum, Classic, Avantgarde og Elegance, en þar eru einmitt smávægilegar útlitsbreytingar milli útfærslna. Avantgarde útfærslan verður nokkuð sportlegri og meðal annars fáanleg með AMG útlitspakka. Hún verður auðþekkjanleg á stórri Benz stjörnunni í grillinu, en á Elegance útfærslunni er stjarnan á sínum hefðbundna stað, ofan á grillinu.
 
Lægsti vindstuðullinn
 
Eins og áður sagði fór blaðamannakynningin fram í Valencia á Spáni og var ekið á milli kunnra ferðamannastaða nálægt Alicante og Benidorm, alls um 500 km í það heila. Íslensku blaðamönnunum voru úthlutaðir vel búnir bílar, Avantgarde 320 CDI dísil með AMG sportpakka og Elegance 350. Aksturinn skiptist í akstur á hraðbrautum og um skemmtilega fjallvegi sem að buðu upp á bæði krappar og hraðar beygjur. Það fyrsta sem maður tók eftir var hversu hljóðlátur bíllinn er á meira en 200 km hraða, en vindstuðull bílsins er sá minnsti í flokknum eða aðeins 0,27 Cd. Þrátt fyrir hávaðarok á Spáni á meðan á prófun hans stóð var ein og allt dytti í dúnalogn þegar búið var að loka bílnum. Eina hljóðið sem heyrist að ráði er lágt urrið frá V6 dísilvélinni. Gaf það strax tóninn um sportlegri takta í þessum nýja bíl. Þau fyriheit voru ekki svikin þegar komið var upp í fjallendið því að nýja C-línan er töluvert sportlegri í akstri, og gilti þá einu hvort að um sé að ræða AMG útfærslu sem er 15 mm lægri eða ekki.
 
Má BMW fara að vara sig?
 
Fjöðrunarkerfið í bílnum er endurhannað og þá sérstaklega ný fjölliða afturfjöðrunin. Demparar voru búnir því sem Benz kallar “Agility control” sem er kerfi sem að lagar viðbragð demparanna eftir akstursaðstæðum. Þegar bíllinn er búinn þessum aukabúnaði er hann einnig með meiri svörun í stýri og fljótari skiptingar. Við þennan pakka er svo hægt að bæta við “Advanced” útgáfu en þá er hægt að stilla á enn sportlegri aksturseiginleika með því einu að ýta á takka. Já, akstuseiginleikarnir eru sportlegri, því er ekki að neita. Hefur bíllinn jafnvel aðeins meiri tilhneigingu til að yfirstýra þegar reynt er mikið á hann í beygjum. Allt gerist þetta þó á mjög öruggan og þægilegan hátt eins og við var að búast í Mercedes en maður er ekki frá því að BMW megi fara að vara sig, svo skemmtilegur er hann.
 
Enn þröngt í aftursæti
 
Að innan er bíllinn ekki síður nýr af nálinni og útlitið ferskt og fágað um leið. Mesta vinnan hefur greinilega verið lögð í framsætin tvö sem eru rafstillanleg á alla vegu. Fótarými hefur verið aukið svo að þeir sem eru háir í loftinu eiga í engum vandræðum með að sitja í þessum bíl. Samt er góður hliðarstuðningur við fætur sem kom sér vel í kröppum beygjudansi, enn eitt merkið um sportlegri hugsunarhátt hjá hönnuðum Benz. Það er líka þægilegt að finna sér góða stillingu með þessum fjölstillanlegu sætum og ekki síður stýri sem kemur vel aftur gerist þess þörf. Hjólhafið í C-línunni var aukið um 45 mm og þótt fótarými sé meira en áður er enn tiltölulega þröngt að komast í aftursætin. Farangursrýmið hefur heldur ekki stækkað mikið er aðkoman að því góð og auðvelt að koma fyrir töskum af öllum stærðum og gerðum.
 
Lækkar jafnvel í verði
 
Að sögn Jóns Trausta Ólafssonar, markaðsstjóra mun verðið á nýju kynslóðinni ekki breytast frá fyrri kynslóð og jafnvel lækka í sumum tilfellum. Bíllinn verður í boði með átta vélum, þremur dísilvélum og fimm bensínvélum. Strax í apríl koma C 200 Kompressor, C 280 og C 350 ásamt C 220 CDI. Í maí er svo hin skemmtilega C 320 CDI væntanleg og í ágúst kemur bíllinn í 4Matic fjórhjóldrifsútfærslu. Í september verða allar gerðir hans komnar á markað, C 180 Kompressor, C 230 og C 200 CDI og þá hefst líka sala á bílnum með Advanced Agility Control búnaðinum. Eftir þessa fyrstu kynningu verður ekki annað sagt en hér sé DaimlerChrysler komnir með skemmtilegri bíl sem henti jafnvel yngri kaupendum en áður. Sú uppskrift er ávísun á velgengni og leiðin á toppinn aftur ætti að verða þeim greið.
 
 
Sumir fjallvegirnir kringum Alicante minna meira á kappakstursbrautir með rauðmáluðum hliðarreinum.
 
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald