Porsche 911 Turbo Cabriolet

Leitin að hinni fullkomnu aksturánægju

 

Öðru hverju kemur hinn fullkomni bíll fram á sjónarsviðið. Porsche 911 var einn af þessum bílum þegar hann kom fyrst fyrir augu manna árið 1964. Þegar bíll aldarinnar var valinn árið 2000 lenti hann í fimmta sæti, á eftir bílum eins og VW bjöllu, Ford T-módel, Mini og Citroen DS. Þrátt fyrir það hélt leit hönnuða Porsche að fullkomnun áfram og árið 1974 var komið að fyrsta 911 Turbo bílnum. Þeir bílar voru auðþekktir á breiðum afturenda til að koma fyrir breiðum afturdekkjum og hinum svokallaða hvalsporði sem var stór vindskeið ofan á vélarhlífinni. Fyrstu Turbo bílarnir voru 260 hestöfl og þekktir fyrir mikið túrbóhik, eitthvað sem hefur alveg horfið með árunum.
 
Reynsluakstur í hjarta Þýskalands
 
Í júní kynnti Porsche nýjasta gæðinginn í hesthúsi sínu, Porsche 911 Turbo Cabriolet. Blaðamannakynningin fór ekki fram á Spáni eða öðrum löndum Suður-Evrópu eins og venjan er oftast með blæjubíla, heldur varð hjarta Þýskalands fyrir valinu, nánar tiltekið bærinn Königstein í nágrenni Frankfurt. Þar hafði markaðsdeild Porsche leigt glæsilegt hótel sem hafði þjónað á árum áður sem bækistöð fyrir yfirmenn í þýska hernum. Staðarvalið átti vel við enda stutt í góðar hraðbrautir með ótakmörkuðum hámarkshraða. Yfir 300 kílómetrar af blönduðum vegum höfðu verið valdir fyrir blaðamennina sem þarna voru saman komnir frá Hong Kong jafnt sem Hollandi. Íslensku blaðamennirnir tveir höfðu líka pínulitla ástæðu til að vera stoltir af þjóðerni sínu því að á meðan blaðamannafundurinn fór fram mátti sjá myndir af bílnum á hinum ýmsu stöðum við suðurströnd Íslands. Hafði bíllinn komið til landsins snemma í vor, áður en hann kom fyrir almennings sjónir.
 
Snöggur upp og léttari
 
Óhætt er að segja að Turbo Cabrio er snöggur upp á lagið. Hann er sléttar fjórar sekúndur í hundraðið með beinskiptingunni en fer niður í 3,8 sekúndur með Tiptronic skiptingunni. Þótt að tölfræðin sé Tiptronic skiptingunni í hag gefur beinskiptingin alltaf betri tilfinningu fyrir akstrinum. Hámarkshraðinn er líka stjarnfræðilegur því að hann nær 310 km hraða, hvorki meira né minna. Þetta er allt saman töluvert betri tölfræði en í gamla bílnum en þrátt fyrir það er nýr Cabrio 10 kílóum léttari en bíllinn sem hann leysir af hólmi. Það er hann þrátt fyrir að vera töluvert betur búinn en fyrirrennari sinn. Blæjuútgáfan er í heildina 70 kílóum þyngri en Coupé útgáfan.
 
Hressilegt tog
 
Vélin í Turbo Cabrio er sú sama og í Coupé bílnum og sama fjórhjóladrifið er líka notað. Hún er 3,6 lítra, sex strokka boxervél sem skilar 473 hestöflum við 6.000 snúninga. Það er 53 hestöflum betur en í fyrri kynslóð. Þökk sé tvöfaldri forþjöppu er aflið alltaf næganlegt í hvaða gír sem er. Þótt maður sé að dóla sér á 90 km hraða í sjötta gír þarf ekki annað en að botna bensíngjöfina og bíllinn tekur hressilega við sér. Svo ekki sé talað um viðbragðið þegar gírarnir eru nýttir til hins ýtrasta, þá er víst betra að stilla vel höfuðpúðana svo maður ofreyni ekki hálsvöðvana. Togið er strax búið að ná 620 Nm hámarki við 1.950 snúninga og helst þannig alveg upp á 5.000 snúninga. Það gefur manni tilfinningu fyrir nær ótakmörkuðu afli að hafa allt þetta tog á svona víðu snúningsviði. Þetta ótakmarkaða afl getur reynst skeinuhætt eins og þegar undirritaður reyndi að gefa bílnum hressilega inn á 80 km hraða í aflíðandi beygju. Eins og hendi væri veifað fór bíllinn þversum í beygjuna og þótt stýrt væri á móti kom PSM kerfið ekki inn fyrr en á síðustu stundu, rétt áður en bíllinn missti alveg stjórn á sér. Þurfti að rétta bílinn við þrisvar sinnum til að ná fullri stjórn á honum. Tekið skal fram að yfirborðið var blautt og mikill gróður í kring sem gæti hafa orsakað hálkuaðstæður.
 
Sami vindstuðull og í Coupé
 
Porsche 911 Turbo Cabriolet er fyrsti blæjubíllinn frá Porsche til að hafa sama vindstuðul og harðtoppurinn. Hann er líka eini blæjubíllinn í heiminum sem státar af vængpressu á afturöxul. Tuskutoppurinn er gerður úr þremur lögum til að halda burtu vindgnauði og jafna hitastig. Segja má að hann hafi verið reyndur við íslenskar aðstæður því að það skiptust á skin og skúrir á meðan á reynsluakstrinum stóð og vindurinn blés líka nokkuð hressilega á köflum. Aldrei vottaði fyrir nokkurri misfellu í blæjunni og óhætt að segja að hún muni þola íslenskar aðstæður vel. Það sem kemur mest á óvart er hversu lítið heyrist í henni þótt farið sé að nálgast hámarkshraða bílsins. Komust íslensku blaðamennirnir mest í 270 km hraða á hraðbrautinni enda umferðin nokkur og lítið um langa beina kafla. Meira að segja reyndum við um 200 km hraða með blæjuna niðri og satt best að segja bærðist varla hár á höfði okkar, svo vel virkaði vindbrjóturinn fyrir aftan sætin. Þegar ekið er undir 50 km hraða er hægt að setja blæjuna upp eða niður á ferð enda reyndi nokkrum sinnum á það þegar droparnir fóru að lenda á kollum okkar. Fer hún í sína stöðu á sléttum 20 sekúndum. Til að vega uppi á móti þakgrindinni í Coupé bílnum eru sérstakir styrktarbitar í hliðunum. Fyrir vikið er hann nokkuð stífur og skekur sig örlítið í verstu ójöfnunum, en samt aldrei svo óþægilegt sé. Tekið skal fram að þetta er viðbúið í bíl með þessu lagi og líklega er það einna minnst í þessum bíl en hjá helstu keppinautum hans.
 
Kemur í haust
 
Bíllinn er væntanlegur á markað með haustinu en ekkert hefur verið ákveðið með sölu hans hér á landi eða hvað hann kemur til með að kosta. Þegar maður horfir á tölurnar og hversu lítill munur er í raun á afli og getu Coupé og Cabrio er það ekki spurning í huga undirritaðs að valið myndi beinast að Cabrio bílnum til að eiga möguleika á að geta sett þakið niður á góðviðrisdögum. Sem staðalbúnað má nefna sex öryggispúða, veltiboga sem spretta upp bak við aftursæti, 19 tommu álfelgur (sem eru með þeim flottari sem undirritaður hefur séð), leiðsögutæki, 12 hátalara Bose hljómtækjum, leðurinnréttingu og búnaði sem fylgist með loftþrýstingi í dekkjunum. Það sem að allir ættu að fá sér sem aukabúnað er aðallega tvennt, Sport Chrono pakkann og keramik bremsurnar. Sport Chrono pakkinn inniheldur meðal annars skeiðklukku en það sem er mest um vert er það sem kallað er “Overboost” og eykur það aðeins við þjöppuna í fprþjöppunni, sem hækkar togið í 680 Nm í örskamma stund. Keramik bremsurnar bíta fast þegar á reynir og gefa ekkert eftir þótt reynt sé á þær vel og lengi. Það eina sem að má segja þeim til vansa er að það ískraði aðeins í þeim þegar bremsað var frekar laust í smástund, eins og oft gerist í innanbæjarakstri, eitthvað sem að hönnuðir Porsche þyrftu að laga.
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald