Nissan Pathfinder

Fer nýjar leiðir
 
Nýjasta kynslóð Nissan Pathfinder jeppans er nú komin á markað hér á landi. Þessum bíl er aðallega ætlað að keppa við vinsældir Toyota Landcruiser hérlendis enda bílarnir um margt svipaðir. Evrópugerðir hans eru smíðaðar í verksmiðju Nissan í Barcelona en bíllinn var hannaður í Bandaríkjunum. Hingað kemur hann með 2,5 lítra dísilvél til að byrja með en einnig er von á öflugri V6 bensínvél síðar á árinu.
 
Rúmgóður og aðgengilegur
 
Fyrstu atriðin sem maður tekur eftir í útliti nýja jeppans eru stórar hjólaskálar og krómaður framendinn. Bíllinn er nýtískulegur í útliti þótt enn megi sjá einkenni eldri útgáfu, eins og hurðarhandfang fyrir afturhurðir við C-bita. Gott aðgengi er í báðar sætaraðir, þökk sé stórum hurðum sem opnast vel. Bíllinn er sjö sæta og er fljótlegt að smella upp sæti til að komast í öftustu sætaröðina. Plássið þar er ekki upp á marga fiska eins og oftast með sjö sæta jeppa, en þó getur meðalmaður komið sér fyrir þar og setið stuttar vegalengdir. Pláss í öðrum sætum er hins vegar gott á alla kanta. Ekki er mikið rými eftir fyrir farangur með öll sæti uppi en einfalt er að leggja niður allt að tvær sætaraðir til að búa til meira rými þegar á þarf að halda. Afturhleri opnast upp og því er varadekk undir bílnum, en opnunin á hleranum mætti vera betri. Innrétting er vel úr garði gerð efnisval nokkuð gott. Allt er innan seilingar en takki fyrir hitastillingu miðstöðvar var óvenju seinvirkur.
 
Geta í torfærum
 
Kraftmikil 2,5 lítra dísilvélin tekur vel við sér með sex þrepa sjálfskiptingunni. Aflið, og þá sérstaklega togið er vel viðunandi sem er góð tilbreyting í Nissan jeppa, en vélin er frekar hávær og gróf. Gírkassinn virkar frekar stífur, sérstaklega ef verið er að færa úr Park í einhverjum halla. Bíllinn virkar mjög stöðugur á malbikinu og liggur vel miðað við bíl í þessum stærðarflokki. Tvöföld klafafjöðrunin étur upp flestar ójöfnur en holur eiga það til að finnast vel í stýri. Mikil geta Pathfinder í torfærum kemur skemmtilega á óvart. Að- og fráfallshorn hans eru rúm enda hjólin mjög utarlega. Við það bætist að veghæð er í betra lagi og ekkert skagar niður í undirvagni hans. Drifbúnaðurinn er endurbætt útgáfa drifbúnaðarins úr X-Trail, og skiptir hann sjálfkrafa úr afturdrifi í fjórhjóladrifi þegar á þarf að halda. Þetta getur komið sér vel í hálku. Með takka úr mælaborði má svo læsa kerfinu í háu eða lágu fjórhjóladrifi.
 
Keppir í verði
 
Um mjög vel búinn bíl er að ræða, sérstaklega í LE útgáfu eins og þeirri sem prófuð var. Meðal búnaðar er tvöföld miðstöð með loftkælingu, áttaviti í baksýnisspegli, regnskynjari, skriðstillir, Xenon ljós, rafstýrt ökumannssæti með minni og sex öryggispúðar. Hægt er að fá hann með svokölluðum IT pakka sem inniheldur leiðsögukerfi, litaskjá með bakkmyndavél, MP3 spilara auk handfrjáls blatannarbúnaðar með raddskynjara fyrir GSM síma. Verðið á Pathfinder í grunnútgáfu er nokkuð gott eða 3.990.000 kr. en hans aðal keppinautur, Toyota Landcruiser kostar minnst 4.290.000 kr. Munurinn er einnig svipaður í dýrari gerðunum og því er spurning hvort að þessi bíll eigi eftir að velgja hinum staðfasta Landcruiser undir uggum.
 
Mynd: Anna Sigurðardóttir
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald