Ford F350

Stór, sterkur og stinnur trukkur

Með lágu gengi dollars hafa sjálfrennireiðar frá bílaþjóðinni Ameríku orðið vinsælar aftur og þá sérstaklega pallbílar. Munar þar einnig um vörugjaldskerfi sem að hyglir þannig bílum þannig að aðeins eru greiddir 10-13% vörugjöld af þeim og í sumum tilfellum engin. Brimborg flytur inn Ford bíla frá bæði Evrópu og Ameríku og bauð til reynsluaksturs á nýrri útgáfu F-350 Super Duty bílsins, sem er stærsta gerð hans. Ekki var þó tekið í bíl með fjórum hjólum á afturhásingu enda falla þeir undir meiraprófsbíla, einnig hjá þeim sem eru með eldri ökuskírteini. Bíllinn slagar þó í fimm tonn svo að þeir sem eru með nýleg ökuskírteini hafa ekki réttindi til að keyra hann, enda miðast meiraprófið í dag við bíla yfir 3,5 tonn.
 
Vel búinn og rúmgóður
 
Trukkur er lýsingarorðið sem á best við bíl eins og þennan, svo einfalt er það. Reyndar er hér um mjög vel búinn bíl að ræða enda reyndum við hann í Lariat útgáfu sem er með leðuráklæðum, rafdrifnum framsætum og hliðarspeglum, skriðstilli og fjarstýrðum samlæsingum svo eitthvað sé nefnt. Þessi var einnig með stillibúnaði fyrir rafmagnsbremsur á kerru en þar sem slíkur búnaður er ekki löglegur hérlendis nýtist hann því miður ekki. Bíllinn er geysilega rúmgóður og væsir ekki um farþega í stórum sætunum. Hægt er að fella niður miðjusæti í fremri röð og er þar komin hálfgerð skrifstofa fyrir ökumanninn. Bíllinn ber það þó aðeins með sér að vera trukkur samt sem áður. Aftursæti eru heill bekkur, þótt að sætin þrjú hafi öll stillanlega höfuðpúða. Framsæti eru aðeins með föstum höfuðpúða sem er hluti af sætinu en það er töluverður galli þar sem að hann verður nánast gagnlaus fyrir vikið. Bíllinn kemur með stórum stigbrettum og veitir ekki af enda þarf að taka tvö skref inn í hann. Hurðir eru flennistórar svo að inn- og útstig er ekkert vandamál. Útsýni er gott með ekkert hús aftan á pallinum en þrátt fyrir hliðarspegla af stærstu gerð er eins og þeir nýtist mjög illa. Er í þeim blindur punktur sem er mjög óþægilegur á jafn stórum bíl og þessum. Neðri speglar eru kúptir og ætlaðir til hægðarauka þegar verið er að bakka bílnum.
 
Öflugur en hastur
 
Þegar vélin er ræst heyrist vel í stórri V8 dísilvélinni. Í akstri er hann þó hljóðlátari en búast mætti við og tiltölulega laus við vindhljóð. Aflið er tilkomumikið og upptakið ekki síðra þegar þyngd bílsins er höfð í huga. Powerstroke vélin er búin túrbínu sem að kemur inn af krafti í kringum 2000 snúninga. Prófað var að draga fullhlaðna kerru á honum og fann hann einfaldlega ekki fyrir henni, slíkt er togið. Á malbikinu er hann nokkuð vel settur en um leið og ekið er yfir holu í veginum eða hraðahindrun finnst vel hversu hastur hann er á blaðfjöðrunum. Ekki batnar það við akstur á grófum malarvegi og kvartaði aftursætisfarþegi sáran. Er það spurning hvort að loftpúðafjöðrun að aftan myndi ekki gera mikið fyrir hann en þess háttar breyting er einföld og líka orðin tiltölulega ódýr í dag. Aðrar breytingar eru lítið mál á þessum stóra bíl enda hafa breytingarfyrirtæki ekki undan við að breyta bílum sem þessum. Að sögn Birgis Guðmundsonar hjá Breyti er mest verið að setja þessa bíla á 35 tommur enda er það sáralítil aðgerð þar sem að aðeins þarf að færa framstuðara. Loftpúðabreyting kostar um 350.000 kr. og er því líka vinsæl, sérstaklega hjá þeim sem eru að fara upp í 44 tommu breytingu.
 
Á hlægilegu verði
 
Í Crew Cab gerðinni með Lariat útfærslu kostar F-350 aðeins 3.960.000 kr með V8 dísilvélinni. Ef hann er tekinn með sjálfskiptingu bætast 168.000 kr. við þá upphæð. Þegar þessar tölur eru settar í samhengi við aðra vinsæla fjórhjóladrifsbíla fer maður að skilja þessar vinsældir. Til að mynda kostar ódýrasta útgáfa Land Cruiser 90 sem er með minni búnaði 4.290.000 kr, ekki það að hann sé svona dýr heldur er Fordinn bara svona hlægilega ódýr. Hvað núverandi vörugjaldskerfi kemur til með að endast lengi er óvíst en margir hafa greinilega hugsað sér gott til glóðarinnar, enda hentar bíllinn vel bæði verktökum og fólki sem er mikið í ýmsu sporti eins og hestamennsu eða vélsleðaferðum svo eitthvað sé nefnt.
Print
Nýjustu fréttir
Kurs jazdy na motor...
Informujemy, |e Bifhjólaskólinn Aðalbraut (szkola jazdy motorem) przeprowadzi...
Styttist í ađ...
Vegna góðrar veðurtíðar er stutt í að verkleg...
Frítt...
Viđ hjá Ađalbraut bjóđum uppá ţá nýjung ađ bjóđa ókeypis A1 mótorhjólapróf ţegar ţađ er tekiđ...

Mótorhjól til leigu

 

Við erum í góðu samstarfi við mótorhjólaleiguna Off Road Tours og bjóðum nemendum okkar að leigja mótorhjól á sérkjörum. Tvær gerðir ferðahjóla eru í boði, Honda NC750X og Honda Africa Twin 1000 og fást þau einnig leigð með töskum og galla. Þau eru auðveld í akstri og því tilvalið að leigja sér hjól einn dag til að halda kunnáttunni við. Einnig er hægt að leigja léttari 250 rsm torfæruhjól sem við bjóðum einnig uppá sérstök námskeið á. Hafðu samband við okkur í síma 869-1330 til að fá leigt hjól.

Njáll Gunnlaugsson

Búðu til þitt eigið nafnspjald